Varie
Lu Presepi Viventi
A Muntapertu avemu, lu prisepiu viventi
li strati sunnu chini di luci e di canti
a visitallu cci vennu tanti genti
di tutti sti biddrizzi restanu spanti.
Nni lu curtigliu di Turiddu Lavinaru
c’è la putia di lu vardiddraru
cchiu’ avanti nna Pitruna c’è u furnaru
ca fa’ panuzzu di, granu sinceru.
Li sarti stannu cu li metri ncoddru
travaglianu cu li mani e lu ciriveddru
la misura nun la sbaglianu cu nuddru
ne’ cu lu bruttu e mancu cu lu beddru.
C’è puru la putia di lu vinu
misu nni la vutti ,ed è di chiddru bonu
cchiu’ avanti c’è un dammusu,tuttu chinu
d’attrezzi e armiggi di l’anticu viddranu.
A Beddramatri si fa’, po’ la nuvena
finu a lu 6 innaru iornu da befana
nni li catoia di Maria Gna Tana
cu lu sagnaturi la pasta si nchiana.
Iennu cchiu’ avanti 30 metri ancora
truvati un arcu cu na’ cumeta fora
c’è na capanna unni s’aspetta l’ura
di la nascita di la DIVINA CRIATURA.
Caminannu ancora avanti c’è lu picuraru
ca duna la ricutteddra cu lu seru
la genti ca si la mangia fa’ un suspiru
gustannu lu fruttu di stu travagliu amaru.
Lu mastru d’ascia è misu ntra un curtigliu
di Luzzu Cavaleri, si nun sbagliu
è lestu e pulitu nni lu so’ travagliu
cu li clienti so’ avi puntigliu.
Lu scarpareddru è misu ntra n’ agnuni
munta la sola e ntaccia lu scarpuni
metti li pezzi nni lu stivaluni
munta li supratacchi chiddri fini.
Nni li curtigli di Saita e Taraddra
truvati li lavannara e po la staddra
a latu c’è la putia cu li viscutteddra
ca linchi di sciauru tutta la vaneddra.
Lu firraru l’avemu l’ultimu di tutti
Mmezzu lu focu lu ferru metti
forgia attrezzi e circuli di vutti
ferri pi li muli e roti di carretti.
Pi tuttu chissu ca st’annu amu avutu
ama ringraziari a Ninu di Cicciu Amatu
a Pippu Montalbanu ca cci à datu aiutu
e a Fiorenza di Lorenzu Principatu. Grazii a tutti chiddri ca annu travagliatu
pi stu prisepiu essiri ammiratu.
Grazii puru a lu Sinnacu Zambutu
e a tutti li genti ca l’annu visitatu.
Scusatimi si iu nun mi prisentu
a dirivi lu mè nomu nun mi sentu
na cosa ca cci tegnu vi rammentu
sugnu MUNTAPIRTISI e mi nni vantu.
Montaperto 26/12/2008
L’autore preferisce restare in anonimato, noi però possiamo dire che trattasi un un ex dipendente telecom in pensione, ai quali facciamo i nostri complimenti.
